1Th 3 | SWP | STEP | To nuamai se tomatomaemiu ema nuatu ai ene besi i lolo aibom Atenai eai ai bawa,

1 Thessalonians 3

Keriso ena bogao tauna, eo hetahetabuena.

1 To nuamai se tomatomaemiu ema nuatu ai ene besi i lolo aibom Atenai eai ai bawa, 2 na Timoteo, ema tau, Eaubada ena tauheaheayai, helemai taupaisoa Keriso ena evanelia debana eai, ai hetamariyawa arimiu eai, ia abo i hetoro headidirimiu, eo emi sunuma debana eai abo i henuatarumiu, 3 teina amamna ta debadi eai tabu tau esau i moimoiu. Na omi au nuatuiyao teina arinai hinage se hetorodao. 4 Mamohoi nabada eai wa ai maemiu ta miamiaesega wa, ai heribanonohaimiuo ita amamna abo ta hearo; ia ede au hearoyao eo au nuatuiyao. 5 Paana ede teina amnagu se tomatoma ariri wa, esau ea hetamariyawa emi sunuma wasana bena ea ataiei, ata taunohonoho i nohoimiuo, eo ama paisoa wa ai abigaibui.

6 Abo ina ta Timoteo arimiu eai i uioma i laoma arimai eai, emi sunuma eo emi gadosisi wasadi lolodi i ledima, eo si ene au nuanuatuimai huia gamagamagari, eo au henua ariri bena au itamai, doha hinage ai, ai henua bena ai itamiu. 7 Ema tataoyao e, ema amamna eo ema nuadubu gamagamagari arinai nuamai abo se taru, emi sunuma debana eai. 8 Emi mauri ede ina, taba omi Guiau boeana eai au toro tahitahinei. 9 Lautoi esana arinai debamiu eai Eaubada ai lautoiei, ema kode gamagamagari arinai ai kode omi debamiu eai, eda Eaubada matana eai. 10 Maiona eo asubena ai uura adiadidiri bena matamiu abo ai itadi, eo bena emi sunuma otadi abo ai hemotuladiwa.

11 Na Eaubada iabom, ita Tamada, eo eda Guiau Iesu Keriso, abo i woeaimai ai laowa arimiu eai. 12 Guiau emi haigadosisi abo i hetubu eo i hetadada helailai, eo tatao gamagamagari abo au gadosisiaririedi hinage, doha ai, ai gadosisiaririemiu wa. 13 Arinai abo nuamiu i hetahitahinedi hetabu laulaudi aridi eai, eo abo nige se hegirumiu Eaubada matana eai, ia ede Tamada, eda Guiau Iesu Keriso ena huia lagema eai, ia maena hetabu tataodi gamagamagaridi hinage.